பூமியில் மனிதராக அவதரித்து, இறைவனிடம் சேர்ந்த மங்கையான ஆண்டாள் இந்த பூமியில் அவதரித்த திருநாள் தான் ஆடிப்பூர திருநாள் என புராணங்கள் கூறுகின்றன.
ஆடி மாதத்தில் வரக்கூடிய பூர நட்சத்திரம் உச்சம் பெறக்கூடிய நாள் ஆடிப்பூரம் விழாவாக கொண்டாடப்படுகிறது. பொதுவாக ஆடி மாதம் என்றாலே அம்மனுக்கு மிகவும் உகந்த மாதமாக கொண்டாடப்படுவது வழக்கம். அதிலும் வைணவத்தலங்கள் சிறப்பாக கொண்டாடும் வகையில் ஆண்டாள் நாச்சியார் அவதரித்த தினமாக கொண்டாடப்படுகிறது.
ஆண்டாள் மனிதர்களைப் போல வயிற்றில் பிறக்கவில்லை. அவர் பெருமாளுக்கு சேவை செய்து கொண்டிருந்த பெரியாழ்வாருக்கு துளசி செடிக்கு அடியில் ஆண்டாள் சிசுவாக கிடைத்தாள். அவளை அன்போடும், பண்போடும் வளர்த்து வந்தார் பெரியாழ்வார். அவர் விடியற்காலையில் பூக்களைப் பறித்து மாலைகளைத் தொடுத்து பெருமாளுக்காக அளிப்பது வாடிக்கையாக வைத்திருந்தார்.
ஆனால் ஆண்டாளோ பெரியாழ்வார் தொடுக்கும் மாலைகளை தான் முதலில் அணிந்து பார்த்த பின்னரே பெருமாளுக்கு அளித்தார். இதை ஒரு நாள் கண்டுவிட்ட பெரியாழ்வார் ஆண்டாள் மீது கடிந்து கொண்டார். இறைவனிடம் கண்ணீர் மல்க மன்னிப்பு கேட்டார். அன்று இரவு இறைவன் பெரியாழ்வாரின் கனவில் வந்து ஆண்டாள் சூடிக் கொடுத்த மாலையே தனக்கு வேண்டும் என்றார்.
உடனே கனவிலிருந்து விழித்த பெரியாழ்வார், ஆண்டாள் சாதாரண குழந்தை அல்ல, அவள் தெய்வக்குழந்தை என்பதை புரிந்து கொண்டார். பின்னர் ஆண்டாள் மண வயதை அடைந்ததும், எம்பெருமானின் கட்டளைப்படி ஸ்ரீரங்க அழைத்துச் செல்ல, அங்கு ஸ்ரீ ரங்கநாதரிடம் ஒளியாய் சேர்ந்து கொண்டதாக புராணங்கள் கூறுகின்றன.
அதுமட்டும் அல்லாமல் பூமியில் அவதரித்த அம்மன் ஆடி மாதத்தில் தான் பூப்படைந்ததாகவும், கூறப்படுகிறது. அதை குறிப்பதாக ஆடிப்பூரம் 10 நாட்கள், அம்மன் தினமும் ஒரு கோலத்தில் பக்தர்களுக்கு காட்சி தருவதாக நம்பிக்கை.
அத்துடன் ஆடிப்பூரத்தன்று தான் சித்தர்களும், யோகிகளும் தங்களுடைய தவத்தை தொடங்குகின்றனர் என புராணங்கள் குறிப்பிடுகின்றன. இன்றைய நன்னாளில் திருமணமாகாத பெண்கள், நல்ல கணவன் தன் துணையாக அமைய வேண்டும் என்றும் தீர்க்க சுமங்கலியாக வாழ இறைவனிடம் அருளும்படி வேண்டினால் அந்த வரத்தை ஆதிசக்தி அருளுவதாகவும் கூறப்படுகிறது.
இந்த அற்புத திருநாளில் எழை, எளிய சுமங்கலிப் பெண்களுக்கு புடவை, குங்குமம், மஞ்சள், வெற்றிலை பாக்கு, பணம் வைத்து கொடுப்பதும் உண்டு. அதோடு பலர் மஞ்சள் தாலி கட்டிக் கொள்வர். ஆடிப்பூரம், 10வது திருவிழா ஆண்டாள் திருக்கல்யாணமாகக் கொண்டாடப்படுகிறது.
அந்த திருநாளில் பெண்கள் வீட்டை சுத்தம் செய்து, அலங்கரித்து, ஆண்டாளுக்கு உரிய தாமரைப்பூ, சிகப்பு நிற ஆடை, கல்கண்டு சாதம் ஆகியவற்றை படைப்பார்கள். இதனால் ஆண்டாளின் பூரண அருள் கிட்டும் என்பது நம்பிக்கை.
ஆண்டாளின் திருக்கல்யாண நாளான இன்று பெண்கள் வீட்டினை சுத்தம் செய்து பூஜை அறையை அலங்காரம் செய்வர். ஆண்டாளுக்கும் பிடித்த தாமரைப்பூ, சிகப்பு நிற ஆடை, கல்கண்டு சாதம் இவற்றினை அளிப்பார்கள். வைணவ திருக்கோயில்களில் ஆண்டாளுக்கு மணப்பெண்ணாக அலங்கரித்து, பெருமாளுடன் திருமண விழா நிகழும்.
