உள்ளூராட்சி சபைத் தேர்தலை ஒரு வருடத்திற்கு ஒத்திவைக்க அரசாங்கம் தீர்மானித்துள்ளதாக அரசாங்கத்தின் தகவல்கள் தெரிவிக்கின்றன.
இது சம்பந்தமான அமைச்சரவை பத்திரத்தை அரச சேவைகள், மாகாண சபைகள் மற்றும் உள்ளூராட்சி சபைகள் அமைச்சர் ஜனக்க பண்டார தென்னகோன் (Janka Bandara Thennakoon) அமைச்சரவையில் ஏற்கனவே தாக்கல் செய்துள்ளார்.
கடந்த வாரம் அமைச்சரவையில் தாக்கல் செய்யப்பட்ட இந்த பத்திரம் தொடர்பில் 13ம் திகதி நடைபெற்ற அமைச்சரவைக் கூட்டத்தில் கலந்துரையாடப்படவில்லை எனக் கூறப்படுகிறது.
இது சம்பந்தமாக பிரதமர் மகிந்த ராஜபக்ச (Mahinda Rajapaksa), நிதியமைச்சர் பசில் ராஜபக்ச (Basil Rajapaksa) மற்றும் அமைச்சர் தென்னகோன் ஆகியோர் சந்தித்து கலந்துரையாடிய பின்னர், இது பற்றி அமைச்சரவையில் பேசப்படும் என தெரியவருகிறது.
கடந்த 2017 ஆம் ஆண்டு பெப்ரவரி மாதம் நடைபெற்ற உள்ளூராட்சி சபைத் தேர்தலில் மாநகர சபைகள், நகர சபைகள் மற்றும் பிரதேச சபைகளுக்கு தெரிவு செய்யப்பட்ட உறுப்பினர்களின் பதவிக்காலம் அடுத்தாண்டு பெப்ரவரி மாதம் முடிவடைகின்றது.
கடந்த உள்ளூராட்சி சபைத் தேர்தலில் நாட்டில் உள்ள உள்ளூராட்சி சபைகளில் பெரும்பான்மையான சபைகளை ஸ்ரீலங்கா பொதுஜன பெரமுனவே ஆட்சி அதிகாரத்தை கைப்பற்றியது.
இந்த நிலையில், உள்ளூராட்சி சபைகள் மற்றும் மாகாண சபைகள் சட்டத்திற்கு அமைய தேர்தலை ஒரு வருடத்திற்கு ஒத்திவைக்கும் அதிகாரம் துறைசார்ந்த அமைச்சருக்கு உள்ளது.
இதனடிப்படையிலேயே அரச சேவைகள், மாகாண சபைகள் மற்றும் உள்ளூராட்சி சபைகள் அமைச்சர் ஜனக்க பண்டார தென்னகோன், உள்ளூராட்சி சபைகளின் பதவி காலத்தை ஓராண்டுக்கு ஒத்திவைக்கும் அமைச்சரவை பத்திரத்தை சமர்ப்பித்துள்ளதாக தெரிவிக்கப்படுகிறது.
இதனிடையே அண்மையில் வைபவம் ஒன்றின் போது கருத்து வெளியிட்டிருந்த ராஜாங்க அமைச்சர் ரொஷான் ரணசிங்க (Roshan Ranasinghe), உள்ளூராட்சி சபைத் தேர்தல் ஓராண்டுக்கு ஒத்திவைக்கப்படும் என கூறியிருந்தார்.
