மகாளய பட்சம் என்பது நம்முடைய முன்னோர்களை நினைத்து வழிபட்டு, அவர்களுக்கு நன்றி தெரிவித்து, அவர்களின் ஆசிகளை பெறுவதற்குரிய காலமாகும்
மகாளய பட்சத்தின் 15 நாட்களும் முன்னோர்களை பிரதானமாக வழிபட வேண்டும். தெய்வ வழிபாட்டை விட முன்னோர்கள் வழிபாட்டிற்கு முக்கியத்துவம் அளிக்க வேண்டிய காலமே மகாளய பட்ச காலமாகும்.
இந்த 15 நாட்களும் விரதம் இருந்து முன்னோர்களை வழிபட வேண்டியது அவசியம். அதோடு கண்டிப்பாக செய்ய வேண்டியது, செய்யக் கூடாதது என மகாளய பட்ச விரத காலத்திற்கு என சில வழிமுறைகள் உள்ளது.
முன்னோர்களின் ஆசிகளை முழுவதுமாக நாம் பெறுவதற்கும், முன்னோர்களை வழிபட்ட முழு பலனையும் நாம் பெறுவதற்கும் என்னென்ன விதிகளை பின்பற்ற வேண்டும் என்பதை இங்கு தெரிந்து கொள்ளலாம்.
மகாளய பட்சத்தில் கண்டிப்பாக செய்ய வேண்டியவை
மகாளய பட்சம் காலத்தின் 15 நாட்களும் காலையில் சூரிய நமஸ்காரம் செய்து, ஆண்கள் எள்ளும் தண்ணீரும் விட வேண்டும். இந்த தண்ணீரை கால் படாத, அதே சமயம் காய்ந்த இடத்தில் தான் சென்று ஊற்ற வேண்டும். செடிகள் இருக்கும் இடத்தில் அவற்றை ஊற்றக் கூடாது.
மகாளய பட்சம் விரதம் கடைபிடிக்கும் காலங்களில் காலை 7 அல்லது 07.30 மணிக்குள் குளித்து விட வேண்டும்.
குளித்து விட்டு முன்னோர்களுக்குரிய கிரகமாக இருக்கும் சூரியனை வணங்கி விட்டு, காலை 9 மணிக்கு உள்ளாக எள்ளும், தண்ணீரும் இறைத்து விட வேண்டும். அதற்கு பிறகு எள்ளும் தண்ணீரும் இறைப்பதனால் எந்த பலனும் கிடையாது.
முன்னோர்களுக்கு படையலிட்டு உணவு படைப்பதை காலை 11.30 முதல் 12 மணிக்குள்ளாக படைத்து விட வேண்டும். அதற்கு மேல் இலை போட்டு முன்னோர்களுக்கு படையிடக் கூடாது.
வாசலில் காவிப் பொடி மட்டுமே பயன்படுத்தி கோலமிட வேண்டுமே தவிர மகாளய பட்சம் காலத்தில் அரிசி மாவு, கோல மாவு, மஞ்சள், குங்குமம் வைத்து வாசலில் கோலமிடக் கூடாது.
மகாளய பட்சம் காலத்தில் முதலில் முன்னோர்களை வழிபட்ட பிறகே, வீட்டில் விளக்கேற்றி, வழக்கமான முன்னோர்கள் வழிபாட்டினை மேற்கொள்ள வேண்டும்.
மகாளய பட்சத்தின் 15 நாட்களில் வரும் அஷ்டமி, நவமி, அமாவாசை ஆகிய திதிகளை கண்டிப்பாக தவற விடாமல் முன்னோர்கள் வழிபட பயன்படுத்த வேண்டும்.
திருமணமான பெண்கள் கண்டிப்பாக எள்ளும் தண்ணீரும் இறைக்கக் கூடாது. அது அவர்களின் மாங்கல்ய பலத்தை குறைக்கும்.
மகாளய பட்சத்தின் 15 நாட்களும் தெய்வங்களுக்கு கடைபிடிக்கும் முக்கியமான, பிரதான தெய்வ வழிபாடுகள், விரதங்கள் ஆகியவற்றை தவிர்ப்பது நல்லது.
