தொடருந்து நிலைய அதிபர்கள் சங்கம் முன்னெடுத்த பணிப்புறக்கணிப்புக்கு தீர்வு கிடைக்காத பட்சத்தில் நாளை (02) மீண்டும் பணிப்புறக்கணிப்பு ஆரம்பிக்கப்படும் என அந்த சங்கம் எச்சரித்துள்ளது.
நாடளாவிய ரீதியாக தொடருந்து நிலைய அதிபர்கள் சங்கம் முன்னெடுத்திருந்த தொழிற்சங்க நடவடிக்கை தீபாவளியை முன்னிட்டு 30.10.2024 அன்று நள்ளிரவுடன் இடைநிறுத்தப்பட்டது.
இந்தநிலையில் குறித்த பணிப்புறக்கணிப்பை மீண்டும் முன்னெடுக்கவுள்ளதாக தெரிவிக்கப்பட்டுள்ளது.
எனினும், பணிப்புறக்கணிப்பு இன்று (01) இடம்பெறாது என அச்சங்கத்தின் தலைவர் சுமேத சோமரத்ன குறிப்பிட்டுள்ளார்.
ஆட்சேர்ப்பு, பதவி உயர்வு நடைமுறைகளை முறைப்படுத்துதல், வேதன முரண்பாடுகளை நிவர்த்தி செய்தல் உள்ளிட்ட விடயங்களுக்குத் தீர்வு காணுமாறு கோரிக்கை முன்வைக்கப்பட்டது.
குறித்த கோரிக்கைகள் தொடர்பாக போக்குவரத்து அமைச்சரின் பிரத்தியேக செயலாளர் மற்றும் தொடருந்து திணைக்களத்தின் நிறைவேற்று அதிகாரிகளுடன் நடத்திய கலந்துரையாடல் தோல்வியடைந்ததன் காரணமாகவே நிலைய அதிபர்கள் இந்த தீர்மானத்தை மேற்கொண்டிருந்தமை குறிப்பிடத்தக்கது.
