நாடு எதிர்நோக்கிக் கொண்டிருக்கும் கொரோனா வைரஸ் பரவல் நெருக்கடி நிலையின் மத்தியில் பௌத்த, இந்து, முஸ்லிம், கத்தோலிக்கர்கள் அனைவரும் பல்வேறு சிக்கல்களை எதிர்கொள்ள வேண்டியேற்பட்டாலும், அரசாங்கம் ஒட்டுமொத்த நாட்டு மக்களினதும் நலனை முன்னிறுத்தி சுகாதார நிபுணர்களின் அறிவுறுத்தல்களுக்கு அமைவாகவே செயற்படுகிறது என்று பிரதமர் மஹிந்த ராஜபக்ஷ தெரிவித்துள்ளார்.
அலரிமாளிகையில் நேற்று இடம்பெற்ற சர்வகட்சி தலைவர்கள் மற்றும் உறுப்பினர்களின் கூட்டம் நடைபெற்றது.
அதில் கொரோனா வைரஸ் தொற்றுக்கு இலக்காகி மரணமடைந்த முஸ்லிம் நபரின் உடலை இஸ்லாமிய மதக் கோட்பாடுகளுக்கு அமைவாகப் புதைப்பதற்கு காணப்பட்ட வாய்ப்புக்கள் தொடர்பில் முஸ்லிம் தலைவர்கள் எழுப்பிய கேள்விக்கு பதிலளிக்கையிலேயே அவர் இவ்வாறு குறிப்பிட்டார்.
இவ்விடயத்தில் நாம் நிபுணத்துவம் பெற்றவர்கள் இல்லையென்பதால், வைத்திய நிபுணர்களின் ஆலோசனைகளுக்கு அமைவாக நடவடிக்கைகளை மேற்கொள்வது அவசியமாகும்.
நாடளாவிய ரீதியில் ஊரடங்குச்சட்டத்தை அமுல்படுத்தும் வேளையிலும் நாம் அவர்களின் ஆலோசனைகளைப் பெற்றே செயற்பட்டோம். தற்போதைய நெருக்கடி நிலை அனைத்து மதத்தவர்களையும் பாதித்திருக்கிறது.
எனினும் முழுநாட்டு மக்களின் நலனிலும் எத்தகைய தாக்கங்கள் ஏற்படக்கூடும் என்று சிந்தித்து, அதற்கேற்றவாறு செயற்பட வேண்டியது மிகவும் அவசியமாக உள்ளது என்றும் பிரதமர் குறிப்பிட்டார்.
மேலும் இதுகுறித்து கருத்து வெளியிட்ட சுகாதார சேவைகள் பணிப்பாளர் டாக்டர் அனில் ஜாசிங்க,
கொரோனா வைரஸ் கண்டறியப்பட்டு 3 மாதகாலங்களே ஆகியிருப்பதாகவும், இன்னும் இந்த வைரஸ் தொடர்பாக முழுமையாக விபரங்கள் கண்டறியப்படவில்லை என்றும் சுட்டிக்காட்டினார்.
அதுமாத்திரமன்றி இந்த வைரஸ் பரவக்கூடிய பல்வேறு முறைகள் இன்னமும் கண்டறியப்படுவதாகவும், எனவே அதனைக் கட்டுப்படுத்துவதற்கு சுகாதாரப்பிரிவினர் கடுமையாக முயற்சித்து வருவதாகவும் அவர் குறிப்பிட்டார்.
“இறந்த நபரின் உடலை புதைப்பதில் நாம் ஒட்டுமொத்த நாட்டுமக்களினதும் நலனைக் கருத்திற்கொண்டு செயற்பட வேண்டும். இது மிகவும் உணர்வுபூர்வமான விடயம். ஆனாலும் இதுவிடயத்தில் அனைத்து மக்களின் நலனையே முன்னிறுத்த வேண்டும்” என்றும் அவர் எடுத்துரைத்தார்.
மேலும் இக்கூட்டத்தின் போது சுகாதார அமைச்சர் பவித்ரா வன்னியாராச்சி, இலங்கை முஸ்லிம் காங்கிரஸ் கட்சியின் தலைவர் ரவூப் ஹக்கீம், உதய கம்மன்பில, விமல் வீரவன்ச மற்றும் சுகாதார சேவைகள் பணிப்பாளர் டாக்டர் அனில் ஜாசிங்க ஆகியோர் தமது கருத்துக்களை முன்வைத்தனர்.
