யாழ் மாவட்டத்தில் கொரோனா தொற்று அற்ற நிலைமை தொடர பொதுமக்களும் அதிகாரிகளுக்கு ஒத்துழைப்பு வழங்க வேண்டுமென முன்னாள் கல்வி இராஜாங்க அமைச்சர் விஜயகலா மகேஸ்வரன் கோரிக்கை விடுத்துள்ளார்.
இது தொடர்பில் அவர் வெளியிட்டுள்ள ஊடக அறிக்கை ஒன்றினையும் வெளியிட்டுள்ளார். அதில்,
வெளி மாவட்டங்களிலிருந்து யாழ் மாவட்டத்திற்கு வருபவர்கள் தொடர்பில் அதிக கரிசனை செலுத்த வேண்டும் என்றும் குறிப்பிட்டுள்ளார்.
அத்துடன் யாழ் மாவட்ட அரசாங்க அதிபர் தலைமையில் யாழ்மாவட்டத்தில் கொரோனா ஒழிப்பு செயலணி செயற்பட்டு வருகின்றது.
இந்த நிலையில் நேற்று முன்தினம் கொழும்பு பகுதியில் இருந்து சுகாதாரத் துறையினரின் அனுமதியின்றி உரிய பாஸ் அனுமதியினை பெறாது கொரோனா தொற்று அதிகமுள்ள கொழும்பு மாவட்டத்திலிருந்து ஏழுபேர் யாழ் மாவட்டத்திற்கு அனுமதியின்றி பயணித்துள்ளனர்.
அவர்கள் பாதுகாப்பு தரப்பினரால் இனங்காணப்பட்டு சட்ட நடவடிக்கையின் பின்னர் தனிமைப் படுத்தப்பட்டுள்ளார்கள். இந்த நிலை இனியும் தொடர்வதற்கு யாழ்மாவட்ட கொரோனா ஒழிப்பு செயலணி இடமளிக்க கூடாது என அவர் சுட்டிக்காட்டியுள்ளார்.
எனவே முதலில் பொது மக்களை விழிப்பூட்டும் செயற்பாட்டினை முன்னெடுக்க வேண்டும் என்பதுடன், வெளி மாவட்டத்திலிருந்து குறிப்பாக கொரோனா தொற்று அதிகமுள்ள மாவட்டங்களில் இருந்து யாழ் மாவட்டத்திற்கு வருபவர்கள் தொடர்பில் அதிகாரிகள் கூடிய அக்கறை செலுத்த வேண்டும் என்றும் அவர் குறிப்பிட்டுள்ளார்.
அத்துடன் யாழ்ப்பாண மாவட்டத்தை பொறுத்தவரை இந்த வாரம் கொரோனா தொற்றுக்குள்ளான எவரும் யாழ் மாவட்டத்தில் இனங்காணப்படவில்லை என்றும் கூறிய அவர், இந்த நிலைமை மேலும் தொடர்வதற்கு பொதுமக்கள் அதிகாரிகளுக்கு ஒத்துழைப்பு வழங்கவேண்டும் எனவும் அந்த அறிக்கையில் தெரிவித்துள்ளார்
