சீனப் படையினருடன் ஏற்பட்ட மோதலின் போது இரும்பு கம்பிகள் மற்றும் கற்களைப் பயன்படுத்தி 20 இந்திய வீரர்கள் கொல்லப்பட்டுள்ளனர் என்று ராணுவத் தலைவர்கள் தெரிவித்துள்ளனர்.
இரு தரப்பிலும் உயிரிழப்புகள் ஏற்பட்டதாக இந்திய அதிகாரிகள் முன்னர் வெளிப்படுத்தியிருந்தனர், ஆனால் இந்த வன்முறையில் துப்பாக்கிகள் பயன்படுத்தப்படவில்லை என்ற தகவல் தற்போது வெளியாகியுள்ளது.
எல்லைப் பகுதியில் நேற்று நடந்த வன்முறை சம்பவத்தை சீனா உறுதிப்படுத்தியுள்ளது, ஆனால் தங்கள் தரப்பில் பலியானவர்களின் எண்ணிக்கையை வெளியிட மறுத்துள்ளது.
கால்வான் பள்ளத்தாக்கில் இரத்தக்களரி மோதலைத் தூண்டுவதாக இரு தரப்பினரும் குற்றம் சாட்டியுள்ளனர்.
லடாக்கில் உள்ள பாங்காங் ஏரி, கல்வான் பள்ளத்தாக்குப் பகுதியில் கடந்த மாதம் 2,500க்கும் மேற்பட்ட சீன வீரர்கள் குடில் அமைத்துத் தங்கினர்.
போர்ப்பயிற்சியிலும் ஈடுபடுவதும், பதுங்குக் குழிகள் அமைப்பதிலும் இருந்தனர். இதற்குப் பதிலடியாக இந்திய ராணுவமும் படைகளைக் குவித்தது. இதனால் பதற்றமான சூழல் நிலவியது.
இருதரப்புப் பிரச்சினையைத் தீர்க்க ராணுவக் கமாண்டர்கள் மட்டத்தில் இரு தரப்பு ராணுவத்தினரும் 12 முறை பேச்சுவார்த்தை நடத்தினர். ராணுவ மேஜர் அளவிலான பேச்சுவார்த்தை 3 முறை நடந்தது.
இந்தப் பேச்சுவார்த்தையில் எந்த முன்னேற்றமும் ஏற்படாததையடுத்து இந்திய -சீன வெளிவிவகார அதிகாரிகள் மட்டத்தில் கடந்த 6-ம் திகதி பேச்சுவார்த்தை நடந்தது.
இந்தப் பேச்சுவார்த்தையின் முடிவில் கால்வான் பள்ளாத்தாக்கு, ஹாட் ஸ்பிரிங்ஸ் பகுதியிலிருந்து இரு நாடுகளும் ராணுவத்தைத் திரும்பப் பெற முடிவு செய்து அதற்கான பணியில் இருந்தனர்.
அப்போது இந்திய வீரர்களுக்கும் சீன ராணுவத்தினருக்கும் இடையே ஏற்பட்ட மோதலில் 3 இந்திய ராணுவத்தினர் கொல்லப்பட்டனர். சீன ராணுவத்தினர் தரப்பிலும் 5 பேர் கொல்லப்பட்டதாக முதற்கட்ட தகவல் வெளியானது.
இந்திய ராணுவத்தினர் எல்லை மீறி வந்து சீன ராணுவ அதிகாரிகள் மீது தாக்குதல் நடத்தியதால்தான் தாக்கினோம் என்று சீனா குற்றச்சாட்டியது.
இதுகுறித்து இந்திய வெளிவிவகார அமைச்சகம் வெளியிட்டுள்ள அறிக்கையில், கிழக்கு லடாக்கில் உள்ள கால்வான் பள்ளத்தாக்கில் நடந்த மோதலுக்கு சீன வீரர்கள் தற்போது உள்ள கட்டுப்பாட்டு சூழல் நிலையை மாற்றும் நோக்கத்துடன் நடந்து கொண்டதே காரணம் இந்த மோதலால் இருதரப்பிலும் உயிரிழப்புகள் ஏற்பட்டுள்ளன.
சீன ராணுவ உயரதிகாரிகள் உரிய எச்சரிக்கையுடன் நடந்து கொண்டிருந்தால் இதுபோன்ற மோதலை தவிர்த்து இருக்க முடியும்.
இருப்பினும், இந்த பிரச்சினையில் அமைதியை நிலைநாட்டவும், பேச்சுவார்த்தை மூலம் தீர்வு காணவுமே இந்திய தரப்பில் முயற்சி மேற்கொள்ளப்படுகிறது எனத் தெரிவிக்கப்பட்டுள்ளது.
இந்த நிலையில் லடாக் பகுதியில் இந்திய- சீன ராணுவம் இடையே மோதல் கடுமையாக நடந்துள்ள தகவல் வெளியாகியுள்ளது.
இதில் இந்தியா தரப்பில் தமிழர் உட்பட 20 வீரர்கள் உயிரிழந்துள்ளதாக தகவல் வெளியாகியுள்ளது. அதேவேளை சீனா தரப்பில் 40-கும் மேற்பட்டவர்கள் மரணமடைந்துள்ளதாக ஏஎன்ஐ செய்தி நிறுவனம் தகவல் வெளியிட்டுள்ளது.
இருப்பினும் குறித்த தகவலை இந்தியா அல்லது சீனா உத்தியோகபூர்வாக உறுதிப்படுத்தவில்லை என்பது குறிப்பிடத்தக்கது.
மேலும் குறித்த தாக்குதலில் உயிரிழந்த தமிழக வீரர் பழனியின் இறப்புக்கு தமிழக முதலமைச்சர் எடப்பாடி பழனிசாமி ட்விட்டரில் இரங்கல் தெரிவித்துள்ளார். மேலும், பழனியின் குடும்பத்தினருக்கு தமிழக அரசின் சார்பாக 50 லட்சம் ரூபாய் வழங்கப்படும் என்றும் அவர் தெரிவித்துள்ளார்.
#LadakhBorder பகுதியில் சீன இராணுவம் தாக்கியதில், பாதுகாப்பு பணியில் ஈடுபட்டிருந்த இராமநாதபுரம் – கடுக்கலூர் கிராமத்தைச் சேர்ந்த தமிழக வீரர் திரு.பழனி அவர்கள் உயிரிழந்த செய்தியறிந்து மிகுந்த வேதனை அடைந்தேன். வீரமரணம் எய்திய பழனி அவர்களின் குடும்பத்தினருக்கு எனது ஆழ்ந்த இரங்கல்!
— Edappadi K Palaniswami (@CMOTamilNadu) June 16, 2020
இந்த நிலையில், தெலங்கானா மாநில ஆளுநர் தமிழிசை சௌந்தரராஜன் உயிரிழந்த ராணுவ வீரர்களுக்கு தனது இரங்கலை தெரிவித்துள்ளார்.
ராணுவ வீரர்களை இழந்து வாடும் குடும்பத்தினருக்காக இறைவனிடம் பிரார்த்தனை செய்வதாகவும், உயிரிழந்த ராணுவ வீரர்களின் ஆன்மாக்களை கடவுள் ஆசீர்வதிக்க வேண்டும் என்றும் தனது ட்விட்டர் பக்கத்தில் ஆளுநர் தமிழிசை சௌந்தரராஜன் பதிவிட்டுள்ளார்.
