ஸ்ரீலங்கா பொதுஜன பெரமுனவின் தலைமைப்பதவியை ஜனாதிபதி கோட்டாபய ராஜபக்சவிற்கு வழங்க வேண்டுமென தெரிவித்ததை அடுத்து தற்போது சர்ச்சைக்குரிய அமைச்சராக மாறியுள்ளார் அமைச்சர் விமல் வீரவன்ஸ.
இந்த நிலையில் அமைச்சர் விமல் வீரவன்சவின் கொழும்பிலுள்ள இல்லம் மீது குண்டுத்தாக்குதல் நடத்தப்போவதாக நபரொருவர் தெரிவித்த அழைப்பை அடுத்து பொலிஸார் பல கோணங்களில் விசாரணைகளை ஆரம்பித்துள்ளதாக தெரியவருகிறது.
கொழும்பு வெள்ளவத்தை பொலிஸ் நிலையத்திற்கு கடந்த 12ஆம் திகதி மாலை 03 மணிக்கு இவ்வாறு அழைப்பு மேற்கொண்ட நபர் , வெள்ளவத்தை, ஜோசப் ஸ்டான்லி மாவத்தையிலுள்ள அமைச்சர் விமல் தங்கியிருக்கும் இல்லம் மீது தாக்குதல் நடத்தப்போவதாக தெரிவித்துள்ளார்.
உடனடியாக இது குறித்த விசாரணையை நடத்திய வெள்ளவத்தை பொலிஸார், சிம் அட்டை பதிவாகியுள்ளவரின் தகவலை பெற்றனர்.
யாழ்ப்பாணம் – வல்வெட்டித்துறையைச் சேர்ந்த சுதர்சன் என்பவரது பெயரில் இந்த சிம் அட்டை இருப்பது தெரியவந்த போதிலும் குறித்த நபருடன் பொலிஸார் நடத்திய விசாரணையில் ஜனவரி 13ஆம் திகதி தனது கையடக்கத் தொலைபேசி தொலைந்துவிட்டதாக பதிலளித்துள்ளார்.
இருந்த போதிலும் மேலதிக விசாரணைகளை பொலிஸார் தீவிரப்படுத்தி, தொலைபேசி தற்போது இருக்கும் இடத்தைக் கண்டுபிடித்தனர்.
அந்த இடம், ஹட்டன் – கொட்டகலை, திம்புள்ளபத்த என்ற முகவரியை காட்டியுள்ளது. 119 அவசர இலக்கத்திற்கு வந்த எண்ணை மீள அழைத்தபோது தகாத முறையில் சந்தேக நபர் பேசியதாகவும் கூறப்படுகின்றது.
இதுசம்பந்தமான விசாரணைகள் துரிதமாக இடம்பெற்று வருவதோடு அமைச்சர் விமலுக்கு வெள்ளவத்தையில் மேற்படி முகவரியில் வீடொன்று இல்லை என்பதுவும் தெரியவந்துள்ளது.
