ஆபத்தான கட்டத்தில் இலங்கை – இந்தியா போன்ற நிலையேற்படலாம் என எச்சரிக்கை

இலங்கையில் வைத்தியசாலைகளில் தற்போது காணப்படும் நிலைமை குறித்து அரச வைத்திய அதிகாரிகள் சங்கம் எச்சரிக்கை விடுத்துள்ளது.

கோவிட் தொற்று நோயாளர்களின் எண்ணிக்கை நாட்டில் அதிகரித்துள்ள நிலையில் வைத்தியசாலைகளால் தங்களால் முடிந்தளவிற்கு நோயாளிகளை உள்வாங்கிவிட்டன என அரச வைத்திய அதிகாரிகள் சங்கத்தின் பிரதிநிதி வைத்தியர் பிரசாத் கொலம்பகே தெரிவித்துள்ளார்.

நோயாளர்களின் எண்ணிக்கை அதிகரித்துள்ளதால் வைத்தியசாலை கட்டில்களின் எண்ணிக்கையில் பெரும் பற்றாக்குறை ஏற்பட்டுள்ளது. வைத்தியசாலைகள் சிகிச்சை வழங்ககூடிய எல்லையை கடந்துவிட்டதால் இந்தியாவின் நிலை உருவாகலாம் என அவர் எச்சரித்துள்ளார்.

இதன் காரணமாக தெளிவான திட்டங்களை நாங்கள் முன்வைக்கவேண்டும் என தெரிவித்துள்ள அவர் நிலைமையை கட்டுப்படுத்துவதற்கு பொதுமக்கள் ஒத்துழைப்பு வழங்கவேண்டும் எனவும் வேண்டுகோள் விடுத்துள்ளார்.

கோவிட் வைரசிற்கான ஆரம்பகட்ட அறிகுறிகளை கொண்டுள்ளவர்களிற்கு வீடுகளில் சிகிச்சை வழங்கலாம் என்பது குறித்து அறிவூட்டும் நிகழ்ச்சி திட்டத்தை அரசாங்கம் முன்னெடுக்கவேண்டும் என அவர் வேண்டுகோள் விடுத்துள்ளார்.

தீவிர கிசிச்சை பிரிவுகளின் கட்டில்களின் எண்ணிக்கை 100 கடந்து விட்டன. நிலைமை ஒரு எல்லைக்கு அப்பால் சென்றால் சுகாதார துறை கையாள முடியாத நெருக்கடியை எதிர்கொள்ளக்கூடும் என அரச வைத்திய அதிகாரிகள் சங்கத்தின் பிரதிநிதி எச்சரிக்கை விடுத்துள்ளார்.