இந்திய வீரர் ரோகித் சர்மா 825 புள்ளிகளை பெற்று 3-வது இடத்தை தக்க வைத்து உள்ளார்.
துபாய்:
சர்வதேச கிரிக்கெட் கவுன்சில் (ஐ.சி.சி.) ஒருநாள் போட்டியின் அடிப்படையில் வீரர்களின் தர வரிசை பட்டியலை வெளியிட்டு உள்ளது. இலங்கை-வங்காள தேச அணிகள் இடையே சமீபத்தில் நடந்த ஒரு நாள் போட்டியின் அடிப்படையில் இந்த பட்டியல் வெளியிடப்பட்டு உள்ளது.
இந்திய அணி கேப்டன் வீராட் கோலி 857 புள்ளிகள் பெற்று தொடர்ந்து 2-வது இடத்தில் நீடிக்கிறார். மற்றொரு இந்திய வீரர் ரோகித் சர்மா 825 புள்ளிகளை பெற்று 3-வது இடத்தை தக்க வைத்து உள்ளார்.
மற்ற இந்திய வீரர்கள் யாரும் டாப் 10-ல் இடம் பெறவில்லை. ஷிகர் தவான் 18-வது இடத்தில் உள்ளார். பாகிஸ்தான் கேப்டன் பாபர் ஆசம் 865 புள்ளிகள் பெற்று முதல் இடத்தில் உள்ளார்.
ரோஸ் டெய்லர் (நியூசிலாந்து), ஆரோன் பிஞ்ச் (ஆஸ்திரேலியா), பேர்ஸ்டோவ் ( இங்கிலாந்து), பஹர் ஜமான் (பாகிஸ்தான்), டுபிளசிஸ் (தென் ஆப்பிரிக்கா) வார்னர் (ஆஸ்திரேலியா), ஷாய்ஹோப் (வெஸ்ட் இண்டீஸ்) ஆகியோர் 4 முதல் 10-வது இடங்களில் உள்ளனர்.
பந்துவீச்சு வரிசையில் இந்தியாவை சேர்ந்த ஜஸ்பிரீத் பும்ரா 690 புள்ளிகள் பெற்று 5-வது இடத்தில் உள்ளார்.
வங்காள தேச தொடரில் சிறப்பாக செயல்பட்ட இலங்கை சேர்ந்த துஸ்மந்தா சமீரா மற்றும் இலங்கை கேப்டன் குஷால் பெரேராஆகியோர் முன்னேற்றம் அடைந்து உள்ளனர்.
நியூசிலாந்தை சேர்ந்த டிரெண்ட் போல்ட் 737 புள்ளிகள் பெற்று முதல் இடத்தில் உள்ளார். மெகதி ஹசன் (வங்காளதேசம்), முஜிபுர் ரகுமான் (ஆப்கானிஸ்தான்), மேட் ஹென்றி (நியூசிலாந்து) ஆகியோர் 2 முதல் 4-வது இடங்களில் உள்ளனர்.
ரபடா(தென் ஆப்பிரிக்கா), கிறிஸ் வோக்ஸ் (இங்கிலாந்து), ஹாசல் வுட் (ஆஸ்திரேலியா) முஸ்டாபிசுர் ரகுமான் (வங்காளதேசம்), கம்மின்ஸ் (ஆஸ்திரேலியா) ஆகியோர் 6 முதல் 10-வது இடங்களில் உள்ளனர்.
