டக்அவுட்டில் கேரியரை தொடங்கி, கேப்டன் அளவிற்கு உயர்ந்து நிற்கும் மார்னஸ் லபுஸ்சேனுக்கு இன்று பிறந்த நாள்

ஆஸ்திரேலியாவின் நட்சத்திர பேட்ஸ்மேன் மார்னஸ் லபுஸ்சேனுக்கு இன்று பிறந்த நாள். 27 வயதை நிறைவு செய்து 28-வது வயதிற்கு அடியெடுத்து வைக்கிறார்.

2018-ம் ஆண்டு அக்டோபர் மாதம் பாகிஸ்தானுக்கு எதிராக துபாயில் நடைபெற்ற டெஸ்ட் போட்டியில் முதன்முதலாக அறிமுகம் ஆனார். முதல் போட்டியிலேயே சறுக்கல். முதல் இன்னிங்சில் ரன் கணக்கை துவக்காமல் டக்அவுட் ஆனார். 2-வது இன்னிங்சில் 13 ரன்னில் ஏமாற்றம்.

சிட்னியில் நடைபெற்ற ஆட்டத்தில் இந்தியாவுக்கு எதிராக 81 ரன்கள் எடுத்தார். அதே ஆண்டு இலங்கைக்கு எதிராக 6, 4 சொற்ப ரன்களில் ஆட்டமிழந்தார். இதனால் ஆஸ்திரேலிய அணியின் நிர்வாகம் அவர் மீது மிகப்பெரிய அளவில் நம்பிக்கை வைக்கவில்லை.

இருந்தாலும், 2019-ம் ஆண்டு இங்கிலாந்தில் நடைபெற்ற ஆஷஸ் தொடருக்கான ஆஸ்திரேலிய அணியில் இடம் பிடித்திருந்தார். ஆனால் முதல் போட்டியில் களம் இறக்கப்படவில்லை.

2-வது போட்டி லார்ட்ஸ் மைதானத்தில் நடைபெற்றது. முதல் இன்னிங்சில் ஸ்டீவ் ஸ்மித்திற்கு காயம் ஏற்பட்டு விளையாட முடியாத நிலை ஏற்பட்டது. இதனால் மார்னஸ் லபுஸ்சேனுக்கு மாற்று வீரராக களம் இறங்கும் வாய்ப்பு கிடைத்தது. இந்த வாய்ப்பை கெட்டியாக பிடித்துக் கொண்டார்.

ஆஸ்திரேலியாவுக்கு 267 ரன்கள் வெற்றி இலக்காக நிர்ணயிக்கப்பட்டது. 100 பந்தில் 59 ரன்கள் எடுத்து ஆஸ்திரேலியா போட்டியை டிரா செய்ய முக்கிய பங்கு வகித்தார்.

இந்த இன்னிங்ஸ்தான் அவரது கிரிக்கெட் வாழ்க்கையில் முக்கிய திருப்புமுனையாக அமைந்தது. லீட்ஸ் டெஸ்டில் 74, 80, மான்செஸ்டர் டெஸ்டில் 67, 11, ஓவல் டெஸ்டில் 48, 14 என முத்திரை பதித்தார்.

அதன்பின் ஆஸ்திரேலிய அணியின் பேட்ஸ்மேன் வரிசையில் 3-வது இடத்தை பிடித்து அசைக்க முடியாத வீரராக மாறினார்.

பாகிஸ்தானுக்கு எதிராக தொடர்ந்து 185, 162 இரண்டு சதங்களும், நியூசிலாந்துக்கு எதிராக 143, 215 என ரன்கள் குவித்தார். தொடர்ந்து மூன்று இன்னிங்சில் சதம் கண்ட வீரர் என்ற பெருமையும் பெற்றார்.

இந்தியாவுக்கு எதிராக சிட்னி டெஸ்டில் சதம் விளாசினார். தற்போது வரை 18 டெஸ்ட் போட்டியில் 31 இன்னிங்சில் 1885 ரன்கள் குவித்துள்ளார். இதில் 10 அரைசதம், 5 சதங்கள் அடங்கும். சராசரி 60.80 ஆகும். தற்போது டெஸ்ட் போட்டிகளில் விளையாடும் வீரர்களில் அதிக சராசரி வைத்திருக்கும் வீரர் இவர்தான்.

டக்அவுட்டில் கிரிக்கெட் வாழ்க்கையை தொடங்கி, மாற்று வீரராக களம் இறங்கி வாய்ப்பை கெட்டியாக பிடித்து, ஆஸ்திரேலியாவின் அடுத்த கேட்டனாகவும் அளவிற்கு உயர்ந்துள்ளார் மார்னஸ் லபுஸ்சேன்.