அருகம்பை பகுதியில் விடுதி ஒன்றில் தங்கியிருந்த பிரித்தானிய நாட்டவர் ஒருவர் மர்மமான முறையில் உயிரிழந்துள்ளதாக பொலிஸார் தெரிவித்துள்ளனர். 43 வயதான ஒருவரே இவ்வாறு உயிரிழந்துள்ளதாக பொலிஸார் கூறியுள்ளனர்.
உயிரிழந்த நபர் கடந்த ஆறு மாதங்களுக்கு முன்னர் தனது மனைவியுடன் இலங்கை வந்துள்ளார். ஹிக்கடுவை பகுதியில் தங்கியருந்த அவர், கடந்த 22ம் திகதி தனது சாரதியுடன் அவர் அருகம்பைக்கு சென்றுள்ளார்.
22ம் திகதி இரவு வேறொரு விடுதியில் இடம்பெற்ற விருந்துபசாரத்தில் கலந்துகொண்ட அவர் மறுநாள் தான் தங்கியருந்த விடுதிக்கு திரும்பியுள்ளார். இந்நிலையில், குறித்த நபரின் தொலைபேசி இணைப்பில் இல்லாததால் அது குறித்து உயிரிழந்த நபரின் மனைவி சாரதிக்கு அறிவித்துள்ளார்.
இதனையடுத்து, சாரதி அவரது அறைக்கு சென்று பார்த்தபோது, அவர் உயிரிழந்திருந்தமை தெரியவந்துள்ளது. சம்பவம் தொடர்பில் நீதிவான் விசாரணைகளை முன்னெடுக்கப்பட்டதையடுத்து, சட்டவைத்திய அதிகாரியும் சம்பவ இடத்தை பார்வையிட்டுள்ளார்.
பின்னர் உயிரிழந்தவரின் சடலம் வைத்தியசாலைக்கு கொண்டு செல்லப்பட்டு, கோவிட் பரிசோதனை மேற்கொள்ளப்பட்டுள்ளதாகவும், சம்பவம் குறித்து விசாரணைகள் முன்னெடுத்துள்ளதாகவும் பொலிஸார் கூறியுள்ளனர்.
