17-வது இந்தியன் பிரீமியர் லீக் போட்டி கடந்த மார்ச் மாதம் 22 ம் திகதி தொடங்கிய நிலையில் தற்போது இறுதிக்கட்டத்தை நெருங்கியுள்ளது.
நேற்றையதினம் முதல் எலிமினேட்டர் சுற்று ஆட்டத்தில் பெங்களூரு ரோயல் ஜெலஞ்சர்ஸ் அணியை ராஜஸ்தான் ரோயல்ஸ் அணி வீழ்த்தி வெற்றிபெற்றது.
இதன்மூலம் பெங்களூர் ரோயல் ஜெலஞ்சர்ஸ் அணி ஐ.பி.எல் போட்டியில் இருந்து வெளியேறியது.
இவ்வாறான நிலையில் போட்டிக்கு முன்பு பாதுகாப்பு அச்சுறுத்தல் காரணமாக பயிற்சி ஆட்டம் மற்றும் செய்தியாளர் சந்திப்பை பெங்களூரு அணி ரத்து செய்துள்ளது.
விராட் கோலியின் பாதுகாப்புக்கு அச்சுறுத்தல் இருப்பதாக கிடைத்த தகவலை தொடர்ந்து பயிற்சி ஆட்டம் மற்றும் செய்தியாளர் சந்திப்பு ரத்து செய்யப்பட்டுள்ளதாக கூறப்படுகிறது.
கடந்த திங்கட்கிழமை (20-05-2024) இரவு அகமதாபாத் விமான நிலையத்தில் பயங்கரவாத செயல்களில் ஈடுபட்டதாக சந்தேகத்தின் பேரில் இலங்கையை சேர்ந்த 4 பேரை குஜராத் பொலிஸார் கைது செய்தனர்.
அவர்களது இடங்களை சோதனை செய்த பின் ஆயுதங்கள், சந்தேகத்திற்கு இடமான வீடியோக்கள், குறுஞ்செய்திகளை பொலிஸார் மீட்டதாகக் கூறப்படுகிறது.
அவர்கள் அனைவரும் ஐஸ்.ஐஸ் தீவிரவாத அமைப்புடன் தொடர்புடையவர்கள் என்றும் தெரிவிக்கப்படுகிறது.
இதையடுத்து, முன்னெச்சரிக்கை நடவடிக்கையாக இரு அணிகளின் நிர்வாகங்களுக்கும் குஜராத் பொலிஸ் தரப்பில் தகவல் தெரிவிக்கப்பட்டுள்ளது.
இது தொடர்பில் அகமதாபாத் பொலிஸ் அதிகாரி தெரிவிக்கையில்,
விராட் கோலி அகமதாபாத் வந்த பின் 4 பேர் கைது செய்யப்பட்ட விடயம் தொடர்பில் அறிவுறுத்தப்பட்டது.
விராட் கோலி இந்திய நாட்டின் முக்கிய நபர். அவருக்கு பாதுகாப்பு அளிப்பது எங்களின் முக்கிய பணி என்று தெரிவித்துள்ளார்.
