முல்லைத்தீவு (Mullaitivu) நகர்பகுதியில் அமைந்துள்ள பிரதேச சபையின் பொதுச்சந்தை கட்டடத்தில் உள்ள கடைத் தொகுதிகளில் மூன்று கடைகளில் தீபரவியதால் பாரிய சொத்தழிவு ஏற்பட்டுள்ளது.
குறித்த தீவிபத்து சம்பவம் இன்று (30) அதிகாலைவேளை இடம்பெற்றுள்ளது.
அந்தவகையில் லிங்கம் பல்பொருள் வாணிபம், அன்ரன் பல்பொருள் வாணிபம் ஆகிய இரு வணிக நிலையங்கள் மற்றும் களஞ்சியம் ஒன்றும் இந்த தீவிபத்தின் போது சேதமடைந்துள்ளன.
தீவிபத்து சம்பவம்
இரண்டு கடைகளும் முற்றாக எரிந்துள்ளதுடன் கடையில் உள்ள பொருட்கள் அனைத்தும் எரிந்து சாம்பலாகியுள்ளது.
குறித்த தீ விபத்து மின்சார கசிவினால் ஏற்பட்டிருக்ககூடுமென நம்பப்படுகிறது.
இத் தீவிபத்தினை காவலாளிகள் மற்றும் அதில் உறங்கிக்கொண்டிருந்தவர்கள் விழிப்படைந்து தீயினை கட்டுப்பாட்டிற்குள் கொண்டுவந்துள்ளார்கள்.
தீ யணைப்பு பிரிவு
முல்லைத்தீவு பிரதேச சபையின் அதிகாரிகள் சம்பவ இடத்திற்கு சென்று விசாரணைகளை மேற்கொண்டுள்ளனர்.
முல்லைத்தீவு மாவட்டத்தில் அண்மைக்காலமாக தீ விபத்து சம்பவங்கள் அதிகரித்து வரும் நிலையில் இவ்வாறு தீவிபத்தினை கட்டுப்படுத்தும் தீயணைப்பு பிரிவு இல்லாத நிலை தொடர்ச்சியாக காணப்பட்டு வருகின்றமை குறிப்பிடத்தக்கது.
