தமிழ் மக்களது பிரச்சினைகளை தீர்ப்பதற்கு நாம் இணக்க அரசியலில் பிரவேசிப்பது இன்றைய காலகட்டத்தின் கட்டாய தேவையாகவுள்ளது என்று தமிழ்த் தேசியக் கூட்டமைப்பின் பிரதான கட்சியான தமிழரசுக் கட்சியின் கொழும்பு மாவட்ட கிளையின் தலைவர் சட்டத்தரணி கே. வி. தவராசா தெரிவித்துள்ளார்.
இன்றைய அரசாங்கம் எதிர்வரும் தேர்தலில் மூன்றில் இரண்டு பெரும்பான்மையை பெறுவதற்கு தமிழ் தேசியக் கூட்டமைப்பு நிச்சயமாக ஆதரவு வழங்க வேண்டும்.
தொலைக்காட்சி நிகழ்ச்சி ஒன்றில் கலந்துகொண்டு கருத்த தெரிவிக்கும் போதே இதை குறிப்பிட்டார். தொடர்ந்து தெரிவிக்கையில்,
முன்னொரு காலத்தில் மகிந்த ராஜபக்ச அரசாங்கத்துடன் தமிழ் தேசிய கூட்டமைப்பு அல்லது தமிழரசுக் கட்சி இணைந்து செயற்படுவது என்பது கேள்விக்குறியான விடயமாக இருந்தது.
தமிழ் மக்கள் பலரும் அதனை விரும்பாதவர்களாக காணப்பட்டனர்.
ஆனால் இன்றைய நிலைமை வேறாக உள்ளது. இன்று ஜனாதிபதி கோட்டாபய ராஜபக்ஷ அடுத்து வரும் ஐந்து ஆண்டு காலங்களுக்கு ஜனாதிபதியாக இருக்க போகின்றார்.
அடுத்து வரும் பாராளுமன்றம் நிச்சயமாக மகிந்த ராஜபக்ஷ தலைமையிலான ஒரு அமைச்சரவையை கொண்ட பாராளுமன்றமாக அமையப்போகின்றது.
எனவே தமிழ் மக்களின் சார்பாக இருக்கும் கட்சிகள் இவர்களுடன் எதிர்ப்பு அரசியலை நடத்தி எவ்விதமான பிரயோசனமும் இல்லை.
ஆகவே விரைந்து சென்று தமிழ் மக்களுக்கான தீர்வுகளை பெற்றுக் கொள்வதுடன் அவர்கள் எதிர்நோக்கும் பிரச்சினைகளையும் தீர்த்து வைத்து அரசியலமைப்பில் தமிழ் மக்களுக்கு சார்பான மாற்றங்களை திருத்தங்களைக் கொண்டு வர வேண்டும்.
அதுவே உண்மையான நிலைப்பாடாகும். அந்த அடிப்படையில் இன்றைய அரசாங்கம் நாளைய பாராளுமன்றத்தை அமைக்கின்ற போது அதில் அவர்கள் மூன்றில் இரண்டு பெரும் பான்மையை பெறுவதற்கு தமிழ் தேசியக் கூட்டமைப்பு துணையாக இருக்க வேண்டும்.
ஆகவே அவர்களுக்கு எமது ஆதரவைத் தெரிவிப்பதன் ஊடாகவே தமிழ் மக்களது பிரச்சினைகளுக்கு அவர்கள் ஆதரவை தருவார்கள்.
எனவே இவ்விடயத்தில் தமிழ் கூட்டமைப்பின் பங்காளிக் கட்சிகள் மற்றும் தமிழ் மக்கள் சிந்தித்து செயற்பட வேண்டும் என்றும் அவர் தனது பேட்டியில் தெரிவித்திருந்தார்.
