ஸ்ரீலங்காவில் மாடுகளை வெட்டத்தடை விதிக்க வேண்டும் என ஆளும் கட்சி கூட்டத்தில் நிறைவேற்றப்பட்டுள்ள பிரேரணை முஸ்லிம்களுக்கு எதிரான சர்வதேச நிகழ்ச்சி நிரல் என ஐக்கிய மக்கள் சக்தியின் நாடாளுமன்ற உறுப்பினர் இம்ரான் மஹரூப் தெரிவித்துள்ளார்.
இது தொடர்பாக இன்று கருத்து வெளியிடும்போதே அவர் இந்த விடயத்தினைத் தெரிவித்துள்ளார். தொடர்ந்தும் அவர் கருத்துத் தெரிவிக்கையில்,
முஸ்லிம்களுக்கு எதிரான சர்வதேச நிகழ்ச்சி நிரலின்படி செயல்படும் இந்த அரசு கொண்டுவர எதிர்பார்த்துள்ள இந்த சட்டம் எதிர்பார்த்த ஒன்றுதான். எதிர்காலங்களில் இதைவிட பாரிய இனவாத செயற்பாடுகளை இந்த அரசு முன்னெடுக்க திட்டமிட்டுள்ளது.
அதற்கான சர்வாதிகாரத்தை பெறவே இப்பொழுது 20ஆவது திருத்தச்சட்டத்தை நிறைவேற்றவுள்ளனர். ஆகவே இவற்றை எவ்வாறு எதிர்கொள்வது என்பது தொடர்பில் சிறுபான்மையினர் தீர்க்கமான ஒரு முடிவுக்கு வர வேண்டும்.
இவ்வாறான சந்தர்ப்பங்களில் அரசுக்கு ஆதரவாக உள்ள சிறுபான்மை நாடாளுமன்ற உறுப்பினர்கள் எவ்வாறு செயற்படப் போகிறார்கள்? என்பது தான் கேள்வியாக அமைகின்றது.
சிறுபான்மையினரின் உரிமைகளை பறிக்கும் சட்டங்கள் நிறைவேற்றப்படவுள்ள சந்தர்பங்களில் இவர்கள் தமது சமூகத்தின் உரிமைகளுக்காக பேசுவார்களா என்பது கேள்விக்குறியே.
ஸ்ரீலங்காவில் மாடுவெட்டுதலைத் தடை செய்வது என்பது இயற்கை சமநிலையை குழப்பும் செயற்பாடாகும். விரிவாக சொல்லவேண்டுமானால் இயற்கையான உணவுச்சங்கிலியை குழப்பும் செயற்பாடாகும்.
மாடுவெட்டுதல் தடை செய்யப்படுவதனால் பால்தராத மாடுகளின் எண்ணிக்கையில் பாரிய அதிகரிப்பு ஏற்பட்டு அவை கவனிப்பாரற்று தெருக்களில் சுற்றித்திரியும் நிலை உருவாகும் இதனால் ஏற்படவுள்ள சமூக பொருளாதார சிக்கல்களுக்கு இந்த அரசு முன்வைக்கவுள்ள தீர்வுதான் என்ன?
உள்நாட்டு உற்பத்தியை அதிகரித்து இறக்குமதியை குறைக்கவேண்டும் என கூறும் இந்த அரசு மாடுவெட்டத் தடையால் மற்றும் இறைச்சி இறக்குமதியினாலும் பாதிக்கப்படவுள்ள உள்நாட்டு பண்ணையாளர்களுக்கு அரசு வழங்கவுள்ள தீர்வு என்ன?
இந்த சட்டத்தால் பாதிக்கப்படுவது முஸ்லிம்கள் மட்டுமே என நினைத்தால் அது அரசின் அறியாமை. மாட்டு இறைச்சி, பண்ணை தொழில்களில் நேரடியாகவும் மறைமுகமாகவும் மூவின மக்களும் சம்மந்தப்பட்டுள்ளனர். இவர்கள் அனைவரினதும் பொருளாதாரம் நேரடியாகவும் மறைமுகமாகவும் பாதிக்கப்படும்.
இந்த சட்டமூலத்தால் எமது நாட்டுக்கும் பொருளாதாரத்துக்கும் ஏற்படவுள்ள பாதிப்புக்கள் பற்றி அரசு அறியாமல் இல்லை. முஸ்லிம்களுக்கு எதிரான சர்வதேச நிகழ்ச்சி நிரலின்படி இந்த அரசு செயற்படுவதால் அவர்களுக்கு இந்த பாதிப்புக்கள் பற்றி எந்த அக்கறையும் இல்லை என்றும் அவர் மேலும் தெரிவித்துள்ளார்.
