கோப்பாய் மற்றும் யாழ்ப்பாணத்தில் பட்டப்பகலில் வீடுபுகுந்து திருட்டில் ஈடுபட்ட குற்றச்சாட்டில் இருவர் கைது செய்யப்பட்டுள்ளதாக பொலிஸார் தெரிவித்துள்ளனர்.
யாழ்ப்பாண குற்றத்தடுப்புப் பொலிஸாரினால் இவர்கள் கைதுசெய்யப்பட்டுள்ளனர். குறித்த சந்தேக நபர்களிடமிருந்து 7 பவுண் திருட்டு நகைகள் பறிமுதல் செய்யப்பட்டுள்ளது.சம்பவம் தொடர்பில் தெரியவருகையில்,
வீடுகளில் உள்ளவர்கள் வெளியில் சென்றிருந்த போது, பட்டப்பகலில் வீடுகளை உடைத்து நகைகள் திருட்டுப் போயுள்ளமை தொடர்பில் அண்மையில் யாழ்ப்பாணம் மற்றும் கோப்பாய் பொலிஸ் நிலையங்களில் முறைப்பாடுகள் செய்யப்பட்டன.
சம்பவம் தொடர்பில் யாழ்ப்பாணம் மூத்த பொலிஸ் அத்தியட்சகருக்கு கீழான மாவட்டக் குற்றத்தடுப்பு பொலிஸ் பிரிவினர் விசாரணைகளை முன்னெடுத்தனர்.
பிரிவின் பொறுப்பதிகாரி பிரதான பொலிஸ் பரிசோதகர் நிஹால் பிரான்சிஸ் தலைமையில் மேற்கொள்ளப்பட்ட விசாரணைகளில் நாவற்குழி மற்றும் யாழ்ப்பாணம் புகையிர நிலைய வீதியைச் சேர்ந்த இருவர் கைது செய்யப்பட்டனர் என்றும் பொலிஸார் மேலும் தெரிவித்துள்ளனர்.
