சுடுகாட்டில் முதியவர் ஒருவரின் உடலை தகனம் செய்தவேளை சுடலையில் இருந்த கட்டடம் ஒன்றின் மேற்கூரை இடிந்து வீழ்ந்ததில் 23 பேர் பரிதாபமாக உயிரிழந்தனர். 15 பேர் படுகாயமடைந்தனர்.
இந்த பரிதாபகர சம்பவம் இந்தியாவின் உத்தரபிரதேச மாநிலத்தின் காசியாபாத் மாவட்டத்துக்கு உட்பட்ட முராட்நகருக்கு அருகே உள்ள உக்லார்சி கிராமத்தில் இடம்பெற்றுள்ளது.
குறித்த கிராமத்தில் சுடுகாடு ஒன்று உள்ளது. இங்கு இன்று ஜெய்ராம் (வயது 65) என்ற முதியவரின் உடல் தகன நிகழ்ச்சி நடந்தது. இதில் ஏராளமானோர் கலந்து கொண்டனர்.
அப்போது பலத்த மழை பெய்ததால், உடல் தகன நிகழ்வில் பங்கேற்றவர்கள் உள்பட ஏராளமானோர் அங்குள்ள ஒரு கட்டடத்தில் ஒதுங்கி நின்றனர். அப்போது அந்த கட்டடத்தின் மேற்கூரை திடீரென இடிந்து விழுந்தது.
சமீபத்தில் கட்டப்பட்டிருந்த அந்த கட்டடம் பலத்த மழை காரணமாக பலவீனமடைந்து இருந்ததாக தெரிகிறது. கட்டடத்தின் மேற்கூரை இடிந்து விழுந்ததும், அதில் இருந்தவர்கள் அனைவரும் இடிபாடுகளுக்குள் சிக்கி படுகாயமடைந்தனர்.
இந்த பயங்கர சம்பவத்தில் 23 பேர் இடிபாடுகளுக்குள் சிக்கி பலியானார்கள். இதில் பெரும்பலானவர்கள் ஜெய்ராமின் உறவினர்கள் மற்றும் அயல் வீட்டினர் ஆவர். மேலும் 15 பேர் படுகாயமடைந்தனர். அவர்கள் அனைவரும் மீட்கப்பட்டு காசியாபாத்தில் உள்ள எம்.எம்.ஜி. ஆஸ்பத்திரியில் சிகிச்சைக்காக சேர்க்கப்பட்டு உள்ளனர். இந்த மீட்பு பணிகளில் தேசிய பேரிடர் மீட்பு படையினரும் பங்கேற்றனர்.
ஆஸ்பத்திரியில் அனுமதிக்கப்பட்டவர்களில் பலரின் நிலைமை கவலைக்கிடமாக உள்ளது. அவர்களுக்கு தீவிர சிகிச்சை அளிக்கப்பட்டு வருகிறது. சுடுகாடு மேற்கூரை இடிந்து விழுந்ததில் 23 பேர் உயிரிழந்த சம்பவம் மாநிலம் முழுவதும் பெரும் அதிர்ச்சியை ஏற்படுத்தி உள்ளது.
