இலங்கையில் புர்காவை தடை செய்யும் தீர்மானத்தை அரசு உடனடியாக வாபஸ்பெற வேண்டும் என்று அகில இலங்கை மக்கள் காங்கிரஸ் தலைவரும் நாடாளுமன்ற உறுப்பினருமான ரிஷாத் பதியுதீன் தெரிவித்துள்ளார்.
அதேநேரம், இனவாதிகளைத் திருப்திப்படுத்தும் இவ்வாறான செயற்பாடுகள் சர்வதேச நாடுகளிடமிருந்து எமது நாட்டை தனிமைப்படுத்தும் சூழலை ஏற்படுத்துகின்றது எனவும் அவர் சுட்டிக்காட்டியுள்ளார்.
இலங்கையில் புர்காவைத் தடை செய்வது தொடர்பில் கருத்துத் தெரிவிக்கும் போதே அவர் மேற்கண்டவாறு கூறியுள்ளார். மேலும் தெரிவிக்கையில்,
முஸ்லிம்களை இலக்கு வைக்கும் இவ்வாறான நிகழ்ச்சி நிரல்களை, அரசு கைவிடுவதாகத் தெரியவில்லை.
ஆட்சிக்கு வர உதவிய இனவாதிகளைத் திருப்திப்படுத்தவே இவ்வாறான செயற்பாடுகள் இடம்பெறுகின்றன.
அத்தோடு கோவிட் சூழ்நிலையில் முகக்கவசம், மூக்கை மறைத்தல் என்பன கடைப்பிடிக்கப்படும் காலமிது.
இதைக்கூட புரிந்துகொள்ளாமல், முஸ்லிம்களைப் பழிவாங்கும் மனநிலையில்தான் இந்த அரசு நடந்து கொள்கின்றது.
அரபு நாடுகளின் நண்பன் எனக் கூறும் இந்த அரசு, அரபு நாடுகளிலும் முஸ்லிம் உலகிலும் விரும்பப்படும் ஆடைகளுக்கு அடிப்படைவாதச் சாயம் பூசுவது விந்தையும் வேடிக்கையாகவும் உள்ளது.
இறுதிக் கட்டப் போரிலும் கூட, புர்கா மற்றும் ஹிஜாப் போன்ற முஸ்லிம்களின் கலாச்சார ஆடைகளுக்கு தடை விதிக்கப்படவில்லை.
அரசு தங்களுக்குப் பிடிக்காத ஒருசில அரசியல்வாதிகளைப் பழிதீர்ப்பதற்காக, ஒட்டுமொத்த முஸ்லிம்களின் கலாசார நம்பிக்கையை கொச்சைப்படுத்துவதா?
சமூகங்கள் மீதான ஒடுக்கு முறைகளைத் தொடர்ந்துகொண்டு ஜெனிவாவில் எவ்வாறு வெல்ல முடியும்?
இலங்கையில் புர்கா தடை வருமாக இருந்தால், முஸ்லிம் நாடுகளிலிருந்து மட்டுமல்ல, முகத்தை மறைக்கும் எந்தவொரு முஸ்லிம் பெண்ணும், சுற்றுலாப் பயணியாக இலங்கைக்கு வரப்போவதில்லை.
எமது நாட்டின் சுற்றுலாத்துறையில் இது பாதிப்பை ஏற்படுத்தி, அந்நிய செலாவணியில் பாரிய தாக்கத்தையும் ஏற்படுத்தும் என்பதை அரசு புரிந்து கொள்ளல் அவசியம் என குறிப்பிட்டுள்ளார்.
