முன்னாள் நாடாளுமன்ற உறுப்பினர் துமிந்த சில்வா சிறைச்சாலை உத்தியோகத்தர்களிடம் ஒப்படைக்கப்பட்டுள்ளார்.
ஜனாதிபதியின் பொதுமன்னிப்பின் கீழ் விடுதலை செய்யப்பட்ட முன்னாள் நாடாளுமன்ற உறுப்பினர் துமிந்த சில்வாவின் பொதுமன்னிப்பை இடைநிறுத்தியும், அவரை மீண்டும் கைது செய்து சிறைச்சாலைக்கு அனுப்புமாறும் உச்சநீதிமன்றம் கடந்த மே மாதம் 30்ம் திகதி உத்தரவிட்டிருந்தது.
இந்நிலையில் ஜயவர்த்தனபுர மருத்துவமனையில் சிகிச்சை பெற்று வந்த நிலையில் இன்றைய தினம் துமிந்த சில்வா குற்றப் புலனாய்வுத் திணைக்களப் பொலிஸாரினால் கைது செய்யப்பட்டிருந்தார்.
தற்போது அவர் சிறைச்சாலை அதிகாரிகளிடம் கையளிக்கப்பட்டுள்ளார். அவரது மருத்துவ அறிக்கையைப் பொறுத்து தேசிய மருத்துவமனை அல்லது சிறைச்சாலை மருத்துவமனைக்கு துமிந்த சில்வா விரைவில் மாற்றப்படுவார் என்று சிறைச்சாலை வட்டாரங்கள் தெரிவித்துள்ளன.
இரண்டாம் இணைப்பு
வீடமைப்பு அபிவிருத்தி அதிகார சபையின் தலைவர் துமிந்த சில்வா, ஸ்ரீ ஜயவர்தனபுர வைத்தியசாலையில் சிகிச்சை பெற்று வந்த நிலையில், குற்றவியல் விசாரணை திணைக்கள அதிகாரிகளால் கைது செய்யப்பட்டுள்ளார்.
பொலிஸ் ஊடகப் பேச்சாளர் தல்துவ இதனை உறுதிப்படுத்தியுள்ளார்.
முதலாம் இணைப்பு
துமிந்த சில்வா வைத்தியசாலையில் அனுமதி:கைது செய்ய விரைந்த பொலிஸார்
வீடமைப்பு அதிகார சபையின் தலைவர் துமிந்த சில்வா, ஸ்ரீ ஜயவர்தனபுர வைத்தியசாலையில் அனுமதிக்கப்பட்டுள்ளதாக அந்த வைத்தியசாலையின் தகவல்கள் தெரிவிக்கின்றன.
வைத்தியசாலையில் அனுமதிக்கப்பட்டுள்ள துமிந்த சில்வாவை கைது செய்வதற்காக குற்றவியல் விசாரணை திணைக்களத்தின் அதிகாரிகள் அனுப்பி வைக்கப்பட்டுள்ளதாக கூறப்படுகிறது.
அதேவேளை துமிந்த சில்வாவைவுக்கு வழங்கப்பட்ட பொது மன்னிப்பு செயற்பாட்டை தற்காலிகமாக இடைநிறுத்திய உயர் நீதிமன்றம், அவரை உடனடியாக கைது செய்யுமாறு நேற்று குற்றவியல் விசாரணை திணைக்களத்திற்கு உத்தரவிட்டிருந்தது.
அத்துடன் நீதிமன்றத்தின் இந்த இடைக்கால உத்தரவை நடைமுறைப்படுத்த குற்றவியல் விசாரணை திணைக்களத்திற்கு உதவுமாறு சட்டமா அதிபருக்கு பணிப்புரை விடுக்கப்பட்டது.இதனை தவிர உயர் நீதிமன்றம் துமிந்த சில்வாவின் கடவுச்சீட்டை முடக்கியும் இடைக்கால உத்தரவை பிறப்பித்தது. .
ஹிருணிகா வெளியிட்ட தகவல்
வலிப்பு நோய் காரணமாக வீடமைப்பு அதிகார சபையின் தலைவர் துமிந்த சில்வா, ஸ்ரீ ஜயவர்தனபுர வைத்தியசாலையில் அனுமதிக்கப்பட்டதாக வைத்தியசாலையின் தகவல்கள் கூறுகின்றன.
துமிந்த சில்வாவை கைது செய்ய உயர் நீதிமன்றம் பிடியாணை பிறப்பித்துள்ளதாகவும் அவரது உடல் நிலைமை மோசமாக இல்லை என்றால், அவர் கைது செய்யப்படுவார் என பொலிஸ் ஊடகப் பேச்சாளர் நிஹால் தல்துவ கூறியுள்ளார்.
எது எப்படி இருந்த போதிலும் ஹிருணிகா பிரேமச்சந்திர இன்று முற்பகல் தனது முகநூல் பக்கத்தில் பதிவு ஒன்றை இட்டிருந்ததுடன் ஸ்ரீ ஜயவர்தனபுர வைத்தியசாலையின் 18வது விடுதியில் ஒருவர் அனுமதிக்கப்பட்டுள்ளதாக கூறியிருந்தார்.
