சருமம் ஜொலிஜொலிக்க வீட்டில் இவற்றை முயற்சி செய்து பாருங்கள்..!

பரபரப்பாக இயங்கி கொண்டிருக்கும் நாம் நமது உடல்நலத்திலும் கவனம் கொள்ள வேண்டியது அவசியம். நீங்கள் எவ்வளவு ஆரோக்கியமாக இருக்கிறீர்கள் என்பதை உங்கள் சருமத்தை வைத்தே சொல்லலாம். அந்த அளவுக்கு சரும பராமரிப்பு மிக மிக அவசியம். நீங்கள் ஆரோக்கியமான உணவுகளை எடுத்துக் கொண்டால் உங்கள் சருமமும் பொலிவுடன் இருக்கும். உடற்பயிற்சி செய்வதும், மன அழுத்தத்தை குறைப்பதும் சரும பராமரிப்பிற்கு முக்கியம். உங்கள் சருமத்தை பராமரிப்பதற்கும், பொலிவுடன் வைத்திருப்பதற்கும் என்ன செய்ய வேண்டும் என்பதை இங்கே காண்போம்.

ஆரஞ்சு:நாம் உண்ணும் ஆரஞ்சு பழத்தை விட அதன் தோலில் அதிக அளவில் வைட்டமின் –சி காணப்படுகிறது. இந்த தோலில் பாக்டீரியா எதிர்ப்பு பண்புகள் காணப்படுகின்றன. இதனை Face pack போல் பயன்படுத்துவதன் மூலம் தெளிவான மற்றும் பொலிவான சருமத்தை பெற முடியும். அதே போல் ஆரஞ்சு தோல் மற்றும் தயிர் கலந்து சருமத்தில் தேய்த்தால் உடனடி புத்துணர்ச்சி கிடைக்கும். உங்கள் உடல்நலத்திற்கும் ஆரஞ்சு பழம் நல்லது.

பூசணி:ஆன்டி ஆக்ஸிடென்டுகள், வைட்டமின் ஏ மற்றும் சி, தாதுக்கள் பூசணிக்காயில் நிறைந்துள்ளன. புதிய தோல் செல்களை உருவாக்குவதில் இது முக்கிய பங்கு வகிக்கிறது. மேலும் சருமத்தின் சீரான எண்ணெய் உற்பத்திக்கும் இது உதவும். சருமம் பொலிவு பெற பூசணி விதைகளை சாப்பிடலாம். அதே போல் 3 டீஸ்பூன் பூசணி, அரை டீஸ்பூன் தேன் மற்றும் அரை டீஸ்பூன் பால் ஆகியவற்றை ஒன்றாக கலந்து முகத்தில் தடவி 15-20 நிமிடங்களுக்கு பிறகு கழுவலாம்.

தக்காளி:சரும பராமரிப்பு என்றாலே பலருக்கும் முதலில் நினைவுக்கு வருவது தக்காளி. அதில் அதிக அளவில் வைட்டமின்கள் மற்றும் தாதுக்கள் நிறைந்துள்ளன. தக்காளி சாறை சருமத்தில் தடவினால் பொலிவு பெறும். இது இயற்கையான சன் ஸ்கீரீனாக செயல்படக் கூடியது. தோல்கள் சுருங்குவதை தடுப்பதற்கும் தக்காளி உதவும்.

ஸ்ட்ராபெர்ரி:இதில் ஆல்பா- ஹைட்ராக்ஸில் அமிலம் நிறைந்துள்ளதால் சருமத்தில் உள்ள இறந்த செல்களை அகற்றுவதற்கு உதவுகின்றன. சருமத்தில் ஏற்படும் சுருக்கங்களை குறைப்பதற்கும் இது பயன்படுகிறது. இதில் உள்ள ஒமேகா 3 கொழுப்பு அமிலங்கள் சருமத்தை பாதுகாப்பதற்கு உதவும். நன்றாக அரைத்த ஸ்ட்ராபெர்ரியில் 1 தேக்கரண்டி கோகோ பவுடர் மற்றும் 1 தேக்கரண்டி தேன் கலந்து முகத்தில் தேய்த்துக் கொள்ளலாம்.

பீட்ரூட்:இதில் அதிக அளவில் வைட்டமின்கள் மற்றும் தாதுக்கள் நிரம்பியுள்ளன. அவை உங்கள் சருமத்தை பொலிவு பெறச் செய்யும். முகப்பரு ஏற்படாமல் தடுக்கவும் இது உதவும். பீட்ரூட்டை உணவாக எடுத்துக் கொண்டால் உடல்நலத்திற்கு நல்லது. இதில் உள்ள இரும்பு, பொட்டாசியம், தாமிரம், வைட்டமின் சி சத்துக்கள் முகத்தில் ஏற்படும் கரும்புள்ளிகளை குறைப்பதற்கு உதவும். ரத்தத்தை சுத்திகரிப்பதற்கும் பீட்ரூட் மிக மிக நல்லது.

கேரட்:இதில் உள்ள பீட்டா கரோட்டின் சரும பொலிவு பெறுவதற்கான முக்கிய பங்காற்றுகிறது. இது உயிரணுக்கள் சிதைவதை தடுக்க உதவுகிறது. வயதான தோற்றம் ஏற்படாமல் குறைக்கும் பண்பும் இதற்கு உண்டு. திசு, கண்கள், எலும்புகள், பற்களை ஆரோக்கியமாக வைத்திருக்க கேரட்டில் உள்ள வைட்டமின் ஏ உதவுகிறது. கேரட்டை உங்கள் உணவில் எடுத்துக் கொண்டால் முகப்பறு மற்றும் கரும்புள்ளிகள் வராமல் தடுக்கலாம்.

உருளைக்கிழங்கு:இது இயற்கை பிளீச்சிங் போல் செயல்படுகிறது. உருளைக்கிழங்கை நன்றாக அரைத்து அதனை முகத்தில் தேய்த்து 30 நிமிடத்திற்கு பிறகு கழுவிக் கொள்ளுங்கள். உங்கள் முகம் பொலிவுடன் இருப்பதை உணர முடியும். இறந்த சரும செல்கள், கரும்புள்ளிகளை அகற்ற இது உதவுகிறது. உருளைக்கிழங்கை சாறு எடுத்தோ அல்லது மெல்லிய துண்டுகளாக நறுக்கியோ பயன்படுத்தலாம்.

எலுமிச்சை:இதில் உள்ள வைட்டமின் சி மற்றும் பி சருமத்தை பொலிவுடன் வைத்திருப்பதற்கும், பராமரிப்பதற்கும் உதவுகிறது. இதில் உள்ள இயற்கையான அமிலங்கள் இறந்த சரும செல்களை அகற்றுவதற்கு பயன்படுகிறது. எலுமிச்சம் பழத்தை நறுக்கி அதனை முகத்தில் தேய்த்துக் கொண்டால் சருமம் பளபளப்பாக இருக்கும்.

அனைவரது சருமமும் ஒரே மாதிரியாக இருக்காது. ஒவ்வொருவரது சருமமும் சில மாறுபட்ட பண்புகளை கொண்டிருக்கும். அதற்கேற்ற சரும பராமரிப்பு முறைகளை மேற்கொள்ள வேண்டும். இயற்கை முறையில் நீங்கள் சருமத்தை பராமரிக்கும் போது பக்க விளைவுகள் எதுவும் ஏற்படாது.